ಡಾ.ಎಂ. ಪ್ರಭಾಕರ ಜೋಶಿ ಜೀವನ ಮತ್ತು ಸಾಧನೆ ವಿಚಾರ ಸಂಕಿರಣದಲ್ಲಿ ಪ್ರೊ.ಎಂ.ಎಲ್.ಸಾಮಗ

ಡಾ.ಎಂ.ಪ್ರಭಾಕರ ಜೋಶಿ ಅವರ ವಿಮರ್ಶೆಯಲ್ಲಿ ಸಂಶೋಧಕನ ಚಿಕಿತ್ಸಕ ನೋಟವಿದೆ ಎಂದು ಕರ್ನಾಟಕ ಯಕ್ಷಗಾನ ಬಯಲಾಟ ಅಕಾಡೆಮಿ ಮಾಜಿ ಅಧ್ಯಕ್ಷ ಪ್ರೊ.ಎಂ.ಎಲ್.ಸಾಮಗ ತಿಳಿಸಿದರು.
ಹಿರಿಯ ಸಂಸ್ಕೃತಿ ಚಿಂತಕ, ಯಕ್ಷಗಾನ ಅರ್ಥಧಾರಿ ಡಾ. ಎಂ. ಪ್ರಭಾಕರ ಜೋಶಿ ಅವರ ಕುರಿತು, ಜಗನ್ಮೋಹನ ಅರಮನೆ ಸಭಾಂಗಣದಲ್ಲಿ ಪ್ರಭಾಕರ ಜೋಶಿ ಅಭಿನಂದನಾ ಸಮಿತಿ ಆಯೋಜಿಸಿರುವ ‘ಜೋಶಿ ವಾಗರ್ಥ ಗೌರವ’ ಹೆಸರಿನ ಸಂವಾದ, ವಿಚಾರ ಸಂಕಿರಣ, ತಾಳಮದ್ದಳೆ, ಬಯಲಾಟ ಕುರಿತ ಎರಡನೇ ದಿನದ ಕಾರ್ಯಕ್ರಮದಲ್ಲಿ ಭಾನುವಾರ ‘ಡಾ.ಜೋಶಿ ಜೀವನ ಮತ್ತು ಸಾಧನೆ’ ವಿಚಾರ ಸಂಕಿರಣ ಉದ್ಘಾಟಿಸಿ ಮಾತನಾಡಿದರು.
‘ಡಾ. ಜೋಶಿ ಅವರು ಯಕ್ಷಗಾನ ಪರಂಪರೆ, ಶೈಲಿಗೆ ಹೆಚ್ಚಿನ ಒತ್ತು ನೀಡಿದರು. ಶ್ರುತಿ ಹಾಳು ಮಾಡಬಾರದು ಎನ್ನುವ ಮನೋಭಾವ ಅವರಲ್ಲಿದೆ. ಆದರೆ, ಅಗತ್ಯವಿದ್ದಲ್ಲಿ ಪರಿಷ್ಕರಣೆ ತಪ್ಪಲ್ಲ ಎನ್ನುವುದನ್ನು ಅವರು ಒತ್ತಿ ಹೇಳಿದ್ದಾರೆ. ಅವರು ನೇರವಾಗಿ ವಿಮರ್ಶೆ ಮಾಡಿದ್ದಾರೆ. ಅದರಲ್ಲಿ ಅವರಿಗೆ ಯಾವುದೇ ಮುಲಾಜು ಇಲ್ಲ. ತೆಂಕುತಿಟ್ಟಿನಲ್ಲಿ ಭೀಮನ ವೇಷಧಾರಿಗೆ ಸೌಮ್ಯ ವೇಷವನ್ನು ಬಳಕೆ ಮಾಡಬೇಕಿದೆ.” ಎಂದರು.
“ಶಿವರಾಮ ಕಾರಂತರನ್ನು ‘ಆಡು ಮುಟ್ಟದ ಸೊಪಿಲ್ಲ’ ಎಂದು ಹೇಳಲಾಗುತ್ತದೆ. ಅಂತೆಯೇ ಜೋಶಿ ಅವರು ಯಕ್ಷಗಾನದಲ್ಲಿ ಕೈ ಆಡಿಸದ ಕ್ಷೇತ್ರ ಇಲ್ಲ ಎಂದು ಹೇಳಬಹುದು. ಅವರು ಚಿತ್ರದ ಮೂಲಕ ತಮ್ಮ ವಿಮರ್ಶೆಯಲ್ಲಿ ವಿವರಣೆ ನೀಡುವ ಪ್ರಯತ್ನ ಮಾಡಿದ್ದಾರೆ. ಅವರ ಅರ್ಥಗಾರಿಕೆಯ ಹೇಳಿಕೆಗಳನ್ನು ಸಂಗ್ರಹಿಸಿದರೆ ಒಂದು ಒಳ್ಳೆಯ ಪುಸ್ತಕ ಮಾಡಬಹುದು. ಜೋಶಿ ಅವರ ವಿಮರ್ಶೆಯಲ್ಲಿ ಯಕ್ಷಗಾನದ ಪರಂಪರೆ, ಗುಣಲಕ್ಷಣ, ಹುಟ್ಟು ಬೆಳವಣಿಗೆಯನ್ನು ಕಾಣಬಹುದಾಗಿದೆ” ಎಂದರು.
ಜೋಶಿಯವರ ಸಾಮಾಜಿಕ ವ್ಯಕ್ತಿತ್ವ ಮತ್ತು ಸ್ನೇಹ ಸಂಪರ್ಕ ಕುರಿತು ಮಾತನಾಡಿದ ಸುಳ್ಯ ಸ್ನೇಹ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಡಾ. ಚಂದ್ರಶೇಖರ ದಾಮ್ಲೆ, “ಜೋಶಿಯವರು ತಮ್ಮ ಸಾಧನೆಯ ಹಿಂದೆ ಕುಟುಂಬ, ಗುರುಗಳನ್ನು ನೆನಪಿಸಿಕೊಳ್ಳುತ್ತಾರೆ. ಅವರು ಅರ್ಥಗಾರಿಕೆಯನ್ನು ಮೀರಿ ಬೆಳೆದಿದ್ದಾರೆ. ಹಿರಿಯ ಯಕ್ಷ ಕಲಾವಿದ ಶೇಣಿ ಗೋಪಾಲಕೃಷ್ಣ ಅವರು ರಾಜಕೀಯ ಮಾತನಾಡಿದರೆ, ಜೋಶಿ ಅವರು ರಾಜಕೀಯದ ಜತೆಗೆ ಸಾಮಾಜಿಕ ವಿಷಯಗಳನ್ನೂ ಪ್ರಸ್ತಾಪಿಸುತ್ತಾರೆ” ಎಂದು ಹೇಳಿದರು.
“ಅವರು ತಮ್ಮ ಪತ್ನಿಯಿಂದ ಎರಡು ಪುಸ್ತಕ ಬರೆಯಿಸಿದ್ದಾರೆ. ಮಕ್ಕಳನ್ನು ಒತ್ತಡ ಇಲ್ಲದೆ ಬೆಳೆಸಿದ್ದಾರೆ. ಹಲವಾರು ಗಣ್ಯರ ಜತೆಗೆ ಅವರು ಉತ್ತಮ ಸ್ನೇಹ-ಸಂಪರ್ಕ ಹೊಂದಿದ್ದಾರೆ” ಎಂದರು.
ಜೋಶಿಯವರ ತತ್ತ್ವಚಿಂತನೆ ಕುರಿತು ಮಾತನಾಡಿದ ಚಿಂತಕ ವಿದ್ವಾನ್ ಗ.ನಾ.ಭಟ್ಟ, “ಜೋಶಿ ಅವರು ಗಂಭೀರ ಕೃತಿ ರಚಿಸಿದ್ದಾರೆ. ಅವರ ಬರಹಗಳಲ್ಲಿ ಯಕ್ಷಗಾನ ಕುರಿತು ಗಂಭೀರವಾದ ಚಿಂತನೆಗಳನ್ನು ಕಾಣಬಹುದಾಗಿದೆ” ಎಂದು ಹೇಳಿದರು.
ಚಿಂತಕ ಪ್ರೊ. ರಾಧಾಕೃಷ್ಣ ಕಲ್ಚಾರ್ ಮಾತನಾಡಿ, “ಜೋಶಿ ಅವರ ಅರ್ಥಗಾರಿಕೆಗೆ ಈಗಲೂ ಬೇಡಿಕೆ ಇದೆ. ಅವರ ಭಾಷೆ ಸರಳ. ಆದರೆ ವೇಗ ತೀವ್ರವಾದದ್ದು. ಶ್ರುತಿಯಿಂದ ದೂರ ನಿಂತು ಅರ್ಥಗಾರಿಕೆ ಮಾಡುತ್ತಾರೆ. ಅವರ ಅರ್ಥಗಾರಿಕೆಯಲ್ಲಿ ಭಾವುಕ ಅಂಶ ಕಡಿಮೆ ಇದೆ. ಅವರ ಶೈಲಿಯನ್ನು ಅನುಸರಿಸುವುದು ಕಷ್ಟಕರ” ಎಂದು ಹೇಳಿದರು.
ವೆಂಕಟರಮಣ ಭಟ್ಟ, ಡಾ.ಎಂ. ಪ್ರಭಾಕರ ಜೋಶಿ ಇದ್ದರು.

ಸಿಗಬೇಕಾದ ಗೌರವ ಸಿಕ್ಕಿಲ್ಲ

ಅರ್ಥಧಾರಿ ಪ್ರೊ.ಎಂ.ಎ. ಹೆಗಡೆ ದಂಟಕಲ್, “ಜೋಶಿ ಅವರ ಆಸಕ್ತಿಯಿಂದ ನಾನು ಪುಸ್ತಕ ಬರೆದೆ. ಇಲ್ಲವಾದಲ್ಲಿ ಪುಸ್ತಕ ಬರೆಯಲು ಮುಂದಾಗುತ್ತಿರಲಿಲ್ಲ. ಜೋಶಿ ಅವರು ಯಾರೇ ಇರಲಿ ಅವರಲ್ಲಿರುವ ಗುಣವನ್ನು ಗುರುತಿಸಿ ಅದು ಪ್ರಕಟಗೊಳ್ಳುವಂತೆ ಮಾಡುತ್ತಾರೆ. ಅದು ಅವರ ದೊಡ್ಡ ಗುಣ” ಎಂದರು.
“ಅರ್ಥಗಾರಿಕೆಯಲ್ಲಿ ಜೋಶಿಯವರು ಹಾಸ್ಯದ ಲೇಪನ ನೀಡುತ್ತಾರೆ.
ಹಾಸ್ಯ ಪ್ರವೃತ್ತಿ ಅವರಲ್ಲಿ ಹೆಚ್ಚಾಗಿ ಇರುವುದೇ ಇದಕ್ಕೆ ಕಾರಣವಾಗಿದೆ. ಶಿವರಾಮ ಕಾರಂತರನ್ನು ಬಿಟ್ಟರೆ ಯಕ್ಷಗಾನದ ಬಗ್ಗೆ ಆಳವಾಗಿ ತಿಳಿದುಕೊಂಡವರು ಜೋಶಿಯವರಾಗಿದ್ದಾರೆ. ಆದರೆ ಜೋಶಿ ಅವರಿಗೆ ಸಿಗಬೇಕಾದ ಗೌರವ ಇನ್ನೂ ಸಂದಿಲ್ಲ” ಎಂದು ಹೇಳಿದರು.

ವಿಜಯ ಕರ್ನಾಟಕ ಪತ್ರಿಕೆ ದಿನಾಂಕ 15-05-2017ರಂದು ಪ್ರಕಟಿತ